पनवेल : पनवेल शहरातील तीर्थरूप नानासाहेब धर्माधिकारी उपजिल्हा रुग्णालयात डायलेसिस सेंटर करिता तज्ज्ञांची निवड करून सेंटर सुरू करण्याची मागणी पनवेल पालिकेचे विरोधी पक्षनेते प्रीतम म्हात्रे यांनी राज्यमंत्री आदिती तटकरे यांच्याकडे केली होती. त्यानुसार लवकरच येथील डायलिसिस सेंटर सुरू होणार आहे. याचा लाभ शेकडो नागरिकांना होणार आहे. जिल्हा रुग्णालय अलिबाग येथील डायलेसिस टेकनीशियन साक्षी संजय राजीवले यांची प्रतिनियुक्ति रद्द करून पनवेल येथे हजर होणेबाबत कळविण्यात आले असल्याचे जिल्हा रुग्णालय अलिबाग रायगडचे जिल्हा शल्य चिकित्सक डॉ. सुहास माने यानी पत्राद्वारे कलविले आहे.
पनवेल शहरातील तीर्थरूप नानासाहेब धर्माधिकारी उपजिल्हा रुग्णालयात डायलिसिस सेंटर सुरू करण्यास काही महिन्यापासून लागणारी उपकरणे देखील येथे बसवण्यात आलेली आहेत. परंतु तज्ञांची निवड करण्यात आली नसल्याने रुग्णांची गैरसोय होत आहे. रायगड जिल्ह्यातून येथे उपचार घेण्यासाठी अनेक रुग्ण येत असतात. किडनी आणि मूत्रपिंडाच्या आजाराने त्रस्त रुग्णांना खासगी रुग्णालयात उपचार घेणे खर्चिक असल्याने जिल्ह्यातील रुग्ण दगावण्याची संख्यादेखील वाढत आहे. त्यामुळे तातडीने संबंधित विभागास आदेश देऊन नानासाहेब धर्माधिकारी उपजिल्हा रुग्णालयात तज्ञांची निवड करून सेंटर सुरू करण्यात यावी अशी मागणी विरोधी पक्षनेते प्रितम म्हात्रे, नगरसेविका प्रीती जॉर्ज, डॉक्टर सुरेखा मोहोकर, सारिका भगत यांनी राज्याच्या राज्यमंत्री आणि रायगड जिल्ह्याच्या पालकमंत्री आदिती तटकरे यांच्याकडे केली होती. त्यांच्या या मागणीला यश आले आहे. त्यानुसार पनवेल उपजिल्हा रुग्णालय येथील डायलेसिस यूनिट कार्यान्वित करण्यासाठी जिल्हा रुग्णालय अलिबाग येथील डायलेसिस टेकनीशियन साक्षी संजय राजीवले यांची प्रतिनियुक्ति रद्द करून पनवेल येथे हजर होणेबाबत कलविण्यात आले असल्याचे जिल्हा रुग्णालय अलिबाग रायगडचे जिल्हा शल्य चिकित्सक डॉ. सुहास माने यानी कळविले आहे.